Treinamentu Prienxe Formuláriu Rendimentu Anuál 2019

Ministériu Finansas liuhosi Autoridade Tributária (AT) iha loron 14 Fulan-Fevereiru 2020 konklui ona Treinamentu Prienxe Formuláriu Rendimentu Anuál 2019 ba pessoál hamutuk  250 iha kapitál Dili ne’ebé sai hanesan kontribui impostu ba estadu Timor-Leste.

Tuir Xefe Repartisaun Munisípiu Dili, Luis Norbertu dos Santos Pereira hateten ohin loron ikus ba Treinamentu Prienxe Formuláriu Rendimentu Anuál 2019 nian no kontribuinti barak maka senti orgullu. Tanba ida-ne’e hanesan oportunidade ba sira atu bele aprende liutan, maibé durante treinamentu hahuu ami detekta iha kontribuinti balun sei dúvida atu konta sira-nia impostu. Ami fiar katak, liuhosi treinamentu ida-ne’e bele hasa’e tan sira-nia koñesimentu, abilidade no matenek para oinsa atu sura sira-nia rendimentu ho loloos. Dalabarak sira konta no selu impostu sala afeta ba sira-nia kompañia atu selu multa.

“Hau hanoin katak, kontribuinti sira maka sai parseiru governu nian no sira maka hola parte selu impostu kada fulan no tinan. Estadu garante ba kontribuinti sira atu bele kumpri nafatin nudar sira nia obrigasaun selu imposto ba estadu, ne`ebe vigora tuir lei Autoridade Tributária No.8/2008”.  Informa Xefe Repartisaun Munisípiu Dili, Luis Norbertu dos Santos Pereira.

Tanba ne’e maka ami hakarak halo treinamentu ne’e hodi fó hanoin nafatin ba sira katak, pagamentu impostu utiliza sistema self assessment, significa katak kontribuintis rasik mak deklara, sura ou konta sira nia obrigasaun atu selu impostu. Bainhira sira halo relatóriu ne’ebé la-loos sei fo impaktu mós ba sira-nia kompañia. AT nafatin fó treinamentu ba sira, Atu ba oin bele aprende di’ak liutan no fortifika iha jestaun negósiu hodi bele selu impostu ba estadu.

Xefe Repartisaun Munisípiu Díli reforsa tan katak, treinamentu ne’e planu ba oin AT sei halo mós iha Munisípiu sira seluk inklui Reziaun Administrativa Espesiál Oe-Cusse Ambeno (RAEOA), tanbá sira mós husu hela AT nia apoiu.

Iha sorin seluk tuir kontribuinti hosi Agency Pacific Lda. Joanina V. Xavier hateten ”ida-ne’e hanesan formasaun primeiru ne’ebé ohin ha’u hetan hosi Autoridade Tributária relasiona ho Prienxe Rendimentu Anuál 2019 nian. Formasaun ida-ne’e di’ak tebes-tebes ba ha’u hanesan Agency nomós kompañia lokál sira atu hatene oinsa selu impostu anuál ba estadu ho lolo’os”.

Akresenta tan katak “Tinan ida-ne’e maka ami foin hetan formasaun ida-ne’e, ne’ebé ami senti di’ak atu ami bele aprende tan kona-bá selu impostu ba estadu”. Informa Joanina V. Xavier reprezentante hosi Agency Pacific Lda.

Nune’e mós tuir Diretór Nasionál Inspeksaun Autoridade Tributária (DNIAT) Sr. Armindo de Almeida reforsa liu tan katak, hanesan jestór iha AT, iha obrigasaun atu fó informasaun kona-bá saida maka impostu ba kontribuinti hotu. Selu impostu la fásil, tanba kontribuinti sira hasai rasik sira nia osan hodi selu impostu ba estadu, tambá obrigasaun hirak ne’e tuir lei nebe vigora iha Timor-Leste.

Autoridade Tributária Prepara Dadus kontabilidade tuir regulamentu sira hanesan tuir mai ne’e:

  • Regulamentu UNTAET 2000\18 Artigu 62.o n.o2, kontribuinti hotu-hotu tenki mantein no arkiva dadus contabilidade nian ho di’ak minimál tinan 5 nia laran.
  •  Regulamentu UNTAET 2000\18 Artigu 63.o DNAIT-Atu bele asesu ba dadus ou arkivu sira iha file manuál no iha komputadór.
  • Regulamentu UNTAET 2000\18 Artigu 62.o n.o1, ema ne’ebé responsabiliza atu ko’a no selu impostu iha obrigasaun atu kria dadus kontabilidade nian.